أنا المواطن البسيط
العادى
ليا سنين منتظر أجنى
خيرك يابلادى
اللى بيه بفتخر
وبحكى لولادى
عن عمرى اللى ضاع
وأنا رحال
بين الدلتا والوادى
حارس ترابك من
الأعادى
وقت الشدة أول حد
يكون موجود
روحى على كفى
ورابط حزامى فى
وسطى ونصى
وبأمر الإله راضى
أنا المواطن البسيط
العادى
اللى عايش حياتى كد
وكفاح
يوم جايع يوم شابع
وفى بكره الجديد طامع
عشمان أجنى خيرك يابلادى
بس واضح إن خيرك
مش ليا
ولا لولادى ولاكمان لأحفادى
انا المواطن البسيط
العادى
اللى زرعت الأرض
وعمرت اللى كان فراغ
فاضى
وغيرت شكل المكان
وخليت ليه شأن فوق
الطبيعى والعادى
أنا اللى بنيت الجسور
وشغلت المتور
وخليت العجلة تلف
ودوور
وجبت عملة صعبة
لبلادى
أنا المواطن البسيط
العادى
كل أملى مكان وأمان
وعيشة كريمة
تخلى الضمير راضى
ومعاملة بحترام بجد
مش كلام إعلام
وتثبيت العقول على
الهادى
أنا المواطن البسيط
العادى
من إبداعات
الشاعر
طه الروبى
ليست هناك تعليقات:
إرسال تعليق